Markaðshlutdeild lífeyrissjóða og banka á íbúðalánamarkaði tekur hröðum breytingum um þessar mundir. Nýjustu tölur Seðlabankans sýna að ný sjóðfélagalán námu rétt rúmum milljarði króna í apríl en í sama mánuði lánuðu bankarnir heila 13 milljarða króna til íbúðarkaupa.
Þetta er skörp breyting frá því í nóvember þegar bankakerfið og lífeyrissjóðakerfið voru með jafna hlutdeild, um 10 milljarða hvort, og leita þarf aftur til júlí 2022 til að finna meiri mun en nú í apríl.
Þorsteinn Friðrik Halldórsson
Í fyrri umfjöllun Hluthafans um markaðssókn bankanna kom fram að vaxtamunurinn milli sjóðfélagalána og íbúðalána bankanna hefði horfið snögglega á síðasta ári þegar vextir á sjóðfélagalánum hækkuðu hröðum skrefum og nú eru kjörin orðin sambærileg.
Seðlabankastjóri hefur leitt líkur að því að hin mikla tilfærsla íbúðalána til bankanna á árunum 2020 og 2021 hafi skilað sér í verulegu kostnaðarhagræði í bankakerfinu og þar með minnkandi vaxtaálagi á íbúðalánum.
Minnkandi umsvif lífeyrissjóða á lánamarkaði getur haft töluverða þýðingu fyrir eignamarkaði, ekki síst verðbréfamarkaðinn, þar sem veiting sjóðfélagalána hefur tekið til sín fjármagn sem annars hefði leitað í aðra eignaflokka. Talsvert útflæði var úr öllum verðbréfasjóðum árið 2023 eða um 123 milljarðar króna.
